Според најновите податоци од Државниот завод за статистика на Хрватска, просечната нето плата во Хрватска за јули 2025 година изнесувала 1.437 евра, што претставува номинален пад од 0,5% во однос на јуни 2025 година, а реално е намалена за 0,9%. Истовремено, просечната бруто плата за истиот месец изнесувала 2.000 евра, со пад од 0,4% номинално и 0,8% реално во однос на претходниот месец. Меѓутоа, во однос на јули 2024 година, просечната нето плата номинално пораснала за 9,3%, а реално за 5,0%. Просечната бруто плата за јули 2025 година, исто така, пораснала за 9,8% номинално, односно 5,5% реално во однос на истиот месец минатата година. Највисоки просечни нето плати за јули 2025 година се исплатени во секторот Авиосообраќај, каде што просечната нето плата изнесувала 2.353 евра. Од друга страна, најниска просечна нето плата е во секторот Производство на облека, која изнесувала 937 евра. Највисока бруто плата, е исплатена во истиот сектор (Авиосообраќај), со износ од 3.436 евра, додека најниската бруто плата е во секторот Производство на облека, која изнесувала 1.232 евра. Министерот за здравство, Азир Алиу, на прашањето во неговото интервју за Алсат-М што се случи со ветувањето за вработувања во здравството, како што беше ветувањето за 150 вработувања во Клиничката болница во Тетово, изјави дека не станува збор за неисполнети ветувања, туку за процес што е започнат и е при крај. „Ние не ветивме, туку реализиравме. Процесот не е целосно завршен, но сите чекори за вработување на овие лица се завршени, освен потпишувањето на договорот и завршната средба со директорот. Ова е процес што веќе е во тек и не може да се поништи. Ниту министерот, ниту директорот не можат да одлучат да го откажат по локалните избори – едноставно тоа не е можно,“ – изјави министерот Алиу. Сите кандидати се тестирани и конечната листа е составена. Сега останува само последната административна фаза, што вклучува кратка средба со директорот и потоа потпишување на договорот. Министерот исто така најави дека покрај овие работни места што се во процес, ќе има и нови вработувања, поради големиот недостиг на кадар во здравствениот сектор во Македонија. „Здравствениот сектор е еко-систем што се соочува со сериозен недостиг на медицински сестри, технички кадар и лекари. Ние не можеме да го планираме буџетот врз основа на минатото, туку според реалните потреби. Во моментов го изработивме првиот нацрт-скен на состојбата, и имаме две сценарија: институции со сериозен недостиг и институции со повеќе кадар отколку што е потребно,“ – појасни министерот Алиу. Министерството подготвува внатрешна реорганизација за балансирање на медицинскиот кадар во согласност со потребите, како и за зголемување на транспарентноста и ефикасноста на услугите. „Ќе има реорганизација на услугите и кадарот. Ќе биде потребно време, но целта е здравството да стане поквалитетно и потранспарентно. Со дигитализацијата како трета столбна точка на реформата, граѓаните ќе имаат пристап до информации во реално време за секоја услуга и процес – вклучително и случаите кога има доцнења или пречки,“ – заврши министерот Алиу. Извршниот одбор на Народната банка усвои нова Одлука за макропрудентните мерки поврзани со макропрудентните инструменти за квалитетот на кредитната побарувачка од физичките лица. Со оваа одлука се регулираат основните показатели со кои се оценува кредитоспособноста на физичките лица, кога тие бараат кредити од банките и од штедилниците. Мерките ќе се применуваат од 1 декември 2025 година. Гувернерот д-р Трајко Славески на конференцијата за печатот објасни дека со новата одлука се олеснува кредитирањето за купување или градење прво живеалиште, односно стан или куќа наменети за сопствено живеење. Но, имајќи ги предвид условите на пазарот на недвижности, особено во главниот град, што водат кон забрзан раст на цените на становите, поради што стануваат недостапни за помладите генерации, се врши и затегнување на условите за користење кредит за станбен објект којшто не претставува примарно живеалиште за кредитобарателите. „За сите лица со нерешено станбено прашање, коишто навистина немаат стан/куќа на свое име каде што би живееле, а се очекува дека тоа ќе бидат претежно млади лица и млади брачни парови, со новата одлука се дозволува, без да се наруши пристапот на прудентност, тие да добијат станбен кредит и со учество од 10% од вкупната вредност на објектот за живеење. Наспроти ова, за сите останати случаи, минималното сопствено учество се зголемува од постојните 15% на 25% од вредноста на станот. Исто така, за корисниците на станбени кредити наменети за купување или градење прво живеалиште, ќе останат во важност досегашните лимити на показателот ДСТИ, коишто изнесуваат 55% за изложеноста во денари и 50% за изложеноста со валутна компонента. За сите останати баратели на кредити се предвидуваат пониски нивоа за овие показатели, и тоа од 50% за изложеноста во денари и 45% за изложеноста со валутна компонента.“ - изјави Славески. Имено, олеснувањето при купување прв стан се однесува на лицата коишто навистина немаат стан или куќа на свое име и планираат да купат или да изградат дом за сопствено живеење, за што треба да исполнат одредени критериуми, а се воспоставуваат соодветни механизми за проверка и следење, коишто се детално образложени во Одлуката. „Промените во макропрудентните мерки имаат превентивен карактер и нивната цел е да нѐ заштитат сите нас од прекумерна задолженост, што може да се одрази понатаму на способноста за редовно отплаќање на обврските, како и на вкупната стабилност на финансискиот систем. Истовремено, со овие промени внимаваме да не „ги погодиме“ оние лица кои имаат потреба да го решат своето животно, станбено прашање, овозможувајќи им поповолни критериуми и полесен пристап до кредити, во однос на останатите корисници на кредити“, посочи гувернерот Славески. Со ваквиот пристап, Народната банка се усогласува со практиката на голем број други централни банки во светот. Технолошкиот милијардер Лари Елисон, коосновач на софтверскиот гигант „Oracle“, накратко ја презеде титулата најбогат човек во светот, надминувајќи го Илон Маск. Овој драматичен пресврт се случи по извонредниот скок на акциите на „Oracle“, поттикнат од големата побарувачка на клауд услуги и вештачка интелигенција. Богатството на 81-годишниот Елисон се зголеми за речиси 101 милијарда долари во еден ден, достигнувајќи неверојатни 393 милијарди долари. Растот на вредноста на „Oracle“ е директна последица на силните квартални резултати, кои ги надминаа сите очекувања на Wall Street. Компанијата се позиционираше како клучен играч во трката за вештачка интелигенција, потпишувајќи милијарди долари вредни договори за обезбедување на cloud инфраструктура, вклучувајќи ги и договорите со „OpenAI“. Водството на Елисон беше краткотрајно, бидејќи Маск повторно се врати на врвот со нешто поголемо богатство. Лари Елисон, иако не е толку познат во јавноста како Маск, е еден од највлијателните и најдолговечните фигури во технолошката индустрија. Покрај неговиот удел од 40% во „Oracle“, тој е познат и по својот раскошен начин на живот, поседувајќи мега-јахти, приватни авиони, како и хавајскиот остров Ланаи. Во време кога над 73% од македонските работници примаат плата под просекот, фрапантни се податоците за платите на најбогатите, алармира претседателот на Сојузот на синдикати на Македонија (ССМ), Слободан Трендафилов. Во јули највисоката исплатена нето-плата во земјава изнесувала над 320.000 евра, ССМ побара одговорност и истакна дека оваа плата е еквивалентна на платите на 817 работници со минималец. Трите највисоки плати заедно надминуваат 700.000 евра, што е плата за 1790 работници со минимална плата за еден месец. „Но, уште позагрижувачки се податоците дека во мај има 0 (нула) работници кои примиле минимална плата и 0 (нула) кои примиле просечна плата, што фрла дополнителен сомнеж на состојбите со платите во Македонија“, изјави Трендафилов. Синдикатот посочува на големата неправда и дискриминација во даночниот систем. Според нив, додека работниците со минимални и просечни плати плаќаат 38% придонеси, газдите со милионски примања над највисоката основица од 16 просечни бруто-плати, плаќаат само 10% персонален данок. Премиерот Христијан Мицкоски изјави дека базичната инфлација во земјата за првпат е негативна на месечно ниво, што го оцени како добар индикатор за македонската економија. Мицкоски посочи дека месечната стапка на инфлација за август е намалена во однос на јули, и дека годишната инфлација е намалена од 4,9% на 4,4%. Тој изрази очекување дека трендот на намалување ќе продолжи, со цел инфлацијата да се стабилизира на ниво од 2 до 2,5%. Според премиерот, негативната базична инфлација е важен показател бидејќи токму таа беше главен двигател на општата инфлација. Тој нагласи дека владата води внимателна макроекономска политика, која не е интервенционистичка. Целта на оваа политика, како што објасни, е да се одржи баланс меѓу растот на платите и инфлацијата, со тоа што растот на платите секогаш ќе биде барем двојно поголем од инфлацијата, за да се обезбеди подобар животен стандард за граѓаните. Мицкоски додаде дека Државниот пазарен инспекторат и Комисијата за заштита на конкуренцијата спроведуваат интензивни контроли за да се обезбеди фер пазар, и дека редовно добива извештаи за нивната работа. Иницијативата на Народната банка на Република Македонија за намалување на надоместоците за електронските плаќања дава конкретни резултати. По интензивната комуникација со банките и по намалувањето на трошоците за користење на Македонскиот интербанкарски платен систем (МИПС), банките ги ревидираа своите тарифници, со што значително се намалија надоместоците за платежни услуги. Според Народната банка, сите банки веќе усвоија нови тарифници, а промените се однесуваат и на граѓаните и на компаниите. За граѓаните, надоместоците за електронските плаќања извршени преку МИПС се намалени во просек за околу 50%, додека интерните плаќања, односно оние што се извршуваат во рамките на иста банка, во најголем дел од банките станаа бесплатни. За компаниите, надоместоците за електронските плаќања во МИПС се поевтини во просек за околу 30%, додека електронските интерни плаќања се намалени за околу 55%. Дополнително, банките се префрлаат на поевтини, фиксни надоместоци по трансакција, што значи дека цената на услугата ќе биде однапред позната и нема да зависи од висината на сумата која се плаќа. Дел од банките веќе ги применуваат новите, намалени цени, додека останатите планираат да почнат со нивна примена најдоцна до октомври оваа година. Оваа мерка е дел од пошироката визија на Народната банка за дигитализација и модернизација на платниот систем. Целта е да се поттикне користењето на електронските плаќања, да се зајакне довербата во финансискиот сектор и да се придонесе кон општествено одговорно работење на банките. Во периодот од 25.08.2025 - 31.08.2025 година, Управата за јавни приходи (УЈП) спроведе вкупно 90 теренски контроли за фискализација, насочени кон различни типови деловни субјекти, меѓу кои: ресторани, кафе барови, шанкови, хотели, бутици, бензиски пумпи и други трговски објекти за продажба на мало. Контролите се иницирани претежно по пријави од граѓани преку телефонскиот број 198 и се реализирани во координација со други државни институции. Дополнително, инспекциски надзори се спроведени и на музички и забавни настани со цел да се поттикне транспарентност, да се заштитат правата на потрошувачите и да се охрабрат даночните обврзници да ги почитуваат законските обврски. Од 90 контролирани субјекти, кај 70 не се утврдени неправилности, а кај 20 субјекти биле констатирани неправилности согласно Законот за регистрирање на готовински промет. За утврдените неправилности донесени се 20 прекршочни санкции – глоби, кои ќе бидат одмерени согласно големината на субјектот. За 3 субјекти поради повторено неиздавање фискални сметки во рок од две години изречена е мерка за привремена забрана за вршење дејност (запечатување). На даночните обврзници каде со контролите за фискализација е утврден неевидентиран промет од страна на Управата за јавни приходи, им се укажува истиот да го евидентираат во книговодствената евиденција и соодветно да го прикажат во даночните пријави. Кај даночните обврзници кои доброволно нема да ја усогласат својата книговодствена евиденција во насока на точно пријавување и плаќање на даночните обврски, Управата за јавни приходи ќе спроведе дополнителни надворешни контроли и ќе ги санкционира прекршителите на законските одредби. Макстил АД Скопје, македонска компанија од металургијата, објави склучување на голема зделка со Стопанска банка АД Скопје. На седница на Собранието на акционери, одржана на 2 септември 2025 година, е донесена одлука за одобрување на Договор за мултивалутна кредитна рамка, со што компанијата ќе добие финансиски средства во износ од 45 милиони евра. Кредитната рамка, чија вредност надминува 50% од книговодствената вредност на имотот на компанијата, е наменета за поддршка на тековното работење и за идни инвестициски проекти. Според објавеното известување до Македонската берза, договорот ќе биде со важност до 31 декември 2040 година, а средствата ќе се користат преку дефинирани подлимити. Како гаранција за оваа значајна зделка, Макстил обезбеди залог на подвижен и недвижен имот, меници и корпоративна гаранција од Duferco Internacional Trading Holding S.A., што укажува на цврстата финансиска позиција на компанијата и поддршката од нејзините партнери. Оваа финансиска инјекција се очекува да го зајакне развојниот потенцијал на Макстил, овозможувајќи му да ги реализира своите стратешки планови и да ја зацврсти својата позиција на пазарот. Зделката е дел од долгорочната бизнис стратегија на компанијата, насочена кон одржлив раст и модернизација на производствените процеси. Македонски Телеком АД - Скопје на својата годишна седница, одржана на 30 мај 2025 година, донесе одлука за исплата на дивиденда за 2024 година. Вкупниот бруто износ на дивидендата е 2.382.421.058,00 денари, што претставува 27,62 денари по акција. Право на дивиденда имаат сите акционери кои се евидентирани во книгата на акционери заклучно со 11 јули 2025 година. Последниот ден за тргување со право на дивиденда е 9 јули 2025 година, додека првиот ден на тргување без право на дивиденда е 10 јули 2025 година. Исплатата на дивидендата ќе започне на 25 септември 2025 година. Правните и физичките лица, странски резиденти, се повикуваат да достават податоци за банкарската сметка на која ќе се изврши исплатата најдоцна до 10 септември 2025 година. Странските правни лица треба да достават и "Потврда за резидентен статус" заверена од надлежниот даночен орган, најдоцна еден ден пред исплатата. Странските физички лица треба да достават Единствен даночен број (ЕДБ) за нивна даночна регистрација во Северна Македонија, најдоцна до 10 септември 2025 година. 
