По повод 5 Октомври, Светскиот ден на учителот, Општина Кисела Вода организираше неформален настан на кој беа доделени признанија за 18 најуспешни просветни работници од сите основни училишта на нејзината територија. Наградите се доделуваат како признание за нивниот труд, стручност и посветеност во образовниот процес и работата со младите генерации.
Изборот на најдобрите наставници се спроведе транспарентно преку јавен оглас и стручна комисија, а клучни критериуми беа постигнатите успеси на учениците на државните натпревари, како и сертификатите за континуирано стручно усовршување на наставниците.
На настанот беше истакнато дека Општина Кисела Вода продолжува да го вреднува квалитетот во образованието и да обезбедува подобри услови за работа на наставниот кадар. Признанието „Најдобар наставник за 2026 година“ го добија:
Гордана Арсовска од ООУ „Круме Кепески“, потоа Елизабета Митревска, Мимоза Митиќ, Маја Михаиловска и Велика Миленковска од ООУ „Кирил Пејчиновиќ“, како и Сашка Стефановска Морски, Марија Велковска и Благоја Кечовски од ООУ „Кузман Шапкарев“. Меѓу наградените се и Гордана Ристеска Лукрис од ООУ „Кузман Јосифовски Питу“, Маја Трајковиќ, Тања Калинска и Тони Патровски од ООУ „Невена Георгиева Дуња“, Магдалена Бадарова и Маја Грнчиштанова од ООУ „Рајко Жинзифов“, како и Виолета Трпевска, Наташа Старделова, Јасмина Лакинска и Валентина Кикеркова од ООУ „Св. Климент Охридски“. На археолошкиот локалитет Расница во село Корошишта, Струшко, се објавени најновите резултати од овогодишните истражувања. Најзначајното ново откритие претставува богато војничко погребување проследено со комплетна воена опрема, меѓу која се пронајдени штит, шлем, копја, меч и предмети изработени од злато, бронза и килибар.
Локалитетот Расница го привлече вниманието уште во 2024 година со откривањето на монументална гробна целина и богат археолошки материјал, вклучително бронзен шлем со златни апликации, златен надградник, сребрени предмети и кантарос. Наодите од 2026 година недвосмислено го потврдуваат карактерот на локалитетот како некропола од VI век пр. н.е. и овозможуваат попрецизно проучување на општествената структура, статус и погребните обичаи на елитите во Охридско-струшкиот регион.
На самиот локалитет беа презентирани првичните научни сознанија од страна на археолошкиот тим предводен од д-р Перо Арџанлиев, кустос советник во Националниот археолошки музеј. Со континуираните истражувања, Корошишта се определува како еден од најзначајните новооткриени археолошки комплекси од архајскиот период во државата.
На презентацијата присуствуваа директорката на Националниот археолошки музеј, Магдалена Манаскова, директорката на Управата за заштита на културното наследство, Весела Честоева, како и директорите на НУ Завод и музеј Охрид, Горан Патчев, и на НУ Музеј „д-р Никола Незлобински“ - Струга, Цветлана Василевска. Во Народниот театар „Јордан Хаџи Константинов - Џинот“ во Велес се одржа свечена академија по повод 80 години од основањето на Ловечката федерација на Македонија. На настанот се обрати министерот за земјоделство, шумарство и водостопанство, Борче Серафимовски, кој истакна дека од вкупно 268 востановени ловишта во државата, во постапка за доделување на користење остануваат уште 21, со што целосно се утврдува одговорноста за управување и одржување на секој ловен реон.
Корисниците на ловиштата преземаат конкретни обврски за заштита на дивечот, унапредување на живеалиштата и организирање на функционални ловочуварски служби. Министерот упати јасна порака дека нема да има компромис со ловокрадството, нелегалната трговија со дивеч и криумчарењето трофеи, нагласувајќи дека институциите и ловечката заедница ќе дејствуваат заеднички за санкционирање на сите незаконитости.
Посочувајќи ја Ловечката федерација како клучен економско-социјален партнер на Министерството кој обединува над 20.000 ловци, Серафимовски најави нови иницијативи за современо следење на дивечот, стручни обуки за ловочуварите, спречување болести кај животните и развој на одржлив ловен туризам. За оваа намена ќе се користат и финансиски инструменти од европските и регионалните програми.
На свеченоста присуствуваа и министерот за внатрешни работи Панче Тошковски, градоначалникот на Општина Велес Марко Колев, претседателот на Ловечката федерација Влатко Алексовски, како и бројни претставници на ловечките друштва, ловци и ловочувари од целата земја. Во опсежна и координирана акција на Одделот за сузбивање на организиран и сериозен криминал (ОСОСК), Управата за финансиско разузнавање и специјалните полициски единици, под раководство на ОЈО за ГОКК, сузбиена е 21-члена организирана криминална група инволвирана во трговија со наркотици и економски криминал.
По повеќемесечно истражување, полицијата изврши претреси кај 31 лице на вкупно 36 локации во Прилеп, Скопје и Струга. Притоа од слобода се лишени 20 лица, а пронајдени и одземени се кокаин, марихуана, непозната грутчеста материја, гасен пиштол, муниција, значајна сума на девизни и денарски средства, возила, мотоцикли, мобилни телефони и ваги.
Според истрагата, групата била предводена од лицата Н.В. и М.С., кои ја набавувале дрогата (кокаин и марихуана) од лица од Албанија, Струга, Дебар и Гостивар. Преку мрежа на препродавачи, дрогата се дистрибуирала до купувачи во Прилеп, Битола, Кавадарци, Неготино, Велес и Скопје. Марихуаната се продавала по цена од 500 до 800 денари за грам, додека кокаинот се продавал од 4.000 до 6.000 денари за грам.
Стекнатите парични средства од наркотиците биле внесувани во легалниот платен промет и употребувани за купување на движен и недвижен имот со цел да се прикрие нивното потекло. Според документираните докази, преку такви шеми за перење пари биле пуштени во оптек речиси 5 милиони денари и над 64.000 евра. За сите 21 член од групата е поднесена соодветна кривична пријава до ОЈО за ГОКК. 
