Најнови

Спречен обид за криумчарење на наркотични средства на граничниот премин Богородица

На 25.08.2025 година, на граничниот премин Богородица при извршена контрола со царинско куче на германско патничко моторно возило, со кој за влез во државата се пријавиле двајца германски државјани биле пронајдени наркотици во женска чанта на сопатникот. При извршениот детален преглед, пронајдени се три пластични епрувети завиткани во хартиено марамче наполнети со прашкаста материја во бела боја кокаин, во чантата била пронајдена и една алуминиумска фолија во која била завиткана материја од растително потекло со зеленкаста боја и карактеристичен мирис на марихуана како и 33 парчиња капсули во рефусна состојба исполнети со бела прашкаста материја од групата стероиди со тежина од околу 38,25 грама. Пред да и биде извршен личен претрес, сопатничката од џебот извадила уште шест пластични епрувети наполнети со бела прашкаста материја, спакувани во проѕирна зипер кесичка. Предметот е даден за вештачење во МВР Оддел за форензички испитувања, а против осомничената e поднесена кривична пријава за сторено кривично дело „Неовластено производство и пуштање во промет на наркотични дроги, психотропни супстанции и прекурсори“ казниво по член 215 од КЗ.

Трамп најави нови царини ако државите не ги укинат дигиталните даноци за американските технолошки компании

Американскиот претседател Доналд Трамп, преку објава на својата социјална мрежа Truth Social, испрати предупредување до сите земји кои воведуваат дигитални даноци и регулативи насочени кон американските технолошки компании. Во својата објава, Трамп најави дека ќе воведе дополнителни царини и извозни ограничувања кон земјите кои нема да ги укинат овие мерки. Според Трамп, дигиталните даноци, законите за дигитални услуги и регулативите за дигитални пазари се направени за да ѝ наштетат или да ја дискриминираат американската технологија. Тој нагласи дека дигиталните даноци и регулативи се наменети да им наштетат на американските компании, додека истовремено им даваат целосно слободен влез на најголемите кинески технолошки компании. Трамп предупреди дека доколку овие дискриминаторски постапки не бидат отстранети, тој ќе постави дополнителни царини на нивниот извоз кон САД, како и тоа дека ќе воведе извозни ограничувања на висока технологија и чипови.

Намален бројот на патници превезени со автобус

Според податоците од Државниот завод за статистика, во второто тримесечје од 2025 година бројот на превезени патници во патничкиот патен превоз е намален за 6.3 % во однос на истото тримесечје од претходната година. Во второто тримесечје од 2025 година, вкупниот број на превезените патници во патничкиот патен превоз изнесува 10 007 илјади и е намален за 6.3 % во однос на второто тримесечје од 2024 година, и тоа: - Градскиот превоз е намален за 10.6%. - Приградскиот превоз е намален за 3.5%. - Меѓуградскиот превоз е зголемен за 5.2 %. - Меѓународниот превоз е зголемен за 27.7 %. Вкупниот број на патничките километри е 256 889 илјади и е зголемен за 19.3 % во однос на истиот период од претходната година, и тоа: - Градскиот превоз е зголемен за 35.4%. - Приградскиот превоз е зголемен за 9.1%. - Меѓуградскиот превоз е намален за 0.2%. - Меѓународниот превоз зголемувањето изнесува 32.5 %.

Привремено е запрена постапката за преземање на Стопанска Банка АД Битола

Комисијата за хартии од вредност ја запре постапката за преземање на Стопанска банка АД Битола од страна на српската компанија Алта Гроуп ДОО Белград. Оваа одлука, донесена на 19.8.2025 година, е објавена денес на Македонската берза. „Известуваме дека согласно член 22, став 1 од Законот за преземање на акционерски друштва, Комисијата за хартии од вредност на Република Северна Македонија, на ден 25.8.2025 година заведено под архивски број 02-10332/1 до Стопанска банка а.д. Битола достави Решение УП1 бр.10-54 од 19.8.2025 година, со кое, врз основа на член 1 став 2 од Законот за преземање на акционерски друштва (“Службен весник на Република Македонија„ бр.69/2013, 188/2013, 166/2014, 154/2015, 23/2016 и 248/2018 и „Службен весник на Република Северна Македонија“ бр.21/2020) и член 54 став 1 од Законот за општа управна постапка („Службен весник на Република Северна Македонија“ бр.124/2015), постапувајќи по барањето на Алта Гроуп ДОО Белград, Р. Србија за добивање дозвола за понуда за преземање на акционерското друштво Стопанска банка а.д. Битола, на својата седница одржана на ден 19.08.2025 година донела Решение со кое постапката се запира поради промена на преземачот во рамки на истата групација.“ - пишува во соопштението. Преземачот во Барањето за запирање на постапката истакнал дека останува при намерата за преземање на Стопанска банка а.д. Битола, односно не се откажал од намерата за преземање на Стопанска банка а.д. Битола, туку само врши промена на преземачот во рамките на истата групација.

Се подготвуваат нови мерки за полесен пристап до кредити за прв стан

Гувернерот на Народната банка, Трајко Славески, оствари работна средба со директорот на Агенцијата за катастар, Иван Живковски. На средбата се разговараше за тековната состојба на пазарот на недвижности и можностите за поефикасна размена на информациите, што ќе придонесе за подготвување новите мерки за полесен пристап до кредити за прв стан. Гувернерот Славески нагласи дека во тек се подготовки за воведување мерки со кои ќе се поттикне поповолно кредитирање на објектите за живеење, особено за млади граѓани и брачни парови кои првпат купуваат стан. „Нашата цел е да се овозможат подобри услови и достапност на кредити за становите што се купуваат за живеење. Со тоа ќе им помогнеме на граѓаните што навистина имаат потреба од сопствен дом, во услови кога цените на недвижностите растат“, истакна гувернерот Славески. Директорот Живковски ја изрази подготвеноста на Катастарот за поголема соработка со Народната банка, посочувајќи дека податоците за тековните трендови на пазарот на недвижности се клучни за носењето ефективни мерки.

Произведената електрична енергија во јуни е поголема од потрошената

Според најновите податоци објавени од Државниот завод за статистика, во јуни 2025 година, вкупното бруто-производство на електрична енергија во Македонија изнесува 333 640 MWh, што е за 12.5% повеќе од вкупната бруто-домашна потрошувачка на електрична енергија. Вкупната потрошувачка по видови енергенти изнесува: - Електрична енергија: 296 651 MWh. - Природен гас: 8.334 милиони nm³. - Јаглен: 357 500 тони. - Нафтени продукти: 101 113 тони. Во јуни 2025 година бруто-домашното производство на електрична енергија учествува со 100 % во бруто-домашната потрошувачка на електрична енергија, додека 99.9 % од вкупната потрошувачка на јаглен се употребени за производство на електрична енергија. Во јуни 2025 година во однос на јуни 2024 година потрошувачката на природен гас е намалена за 54.9 %, како резултат на намалената активност на когенеративните постројки додека потрошувачката на нафтени продукти е зголемена за 9.5 %.

Законот за возила конечно ќе почне правилно да се применува

Министерката за енергетика, рударство и минерални суровини, Сања Божиновска, најави значајни измени во Законот за возила. По 17 години од неговото донесување, законот конечно ќе почне правилно да се применува, со што се очекува да се забрза процесот на одобрување возила и да се намалат трошоците за граѓаните. Од 1 септември 2025 година, на сила стапуваат измени кои се резултат на работниот состанок со над 40 овластени застапници и импортери на возила. Целта е да се воспостави фер и транспарентен систем, усогласен со европските стандарди. Новите измени опфаќаат: - Се забрзува и поедноставува одобрувањето на типови возила. - Граѓаните ќе добијат сигурност и поразумни цени за потврди за технички карактеристики. - Процесот на регулирање на одобрувањето на возила сега ќе се врши преку овластените застапници, домашни македонски компании. Со ова, околу 1,3 милиони евра се очекува да се вратат назад кај македонските фирми. - Новите мерки имаат за цел да изградат доверба помеѓу институциите, застапниците и граѓаните. Според Божиновска, ова е чекор напред кон изградба на систем кој е фер, транспарентен и европски, каде што граѓаните се заштитени, а домашните компании добиваат фер услови за работа.

Србија со нови пакет мерки за подобрување на животниот стандард на граѓаните

Претседателот на Србија, Александар Вучиќ, претстави нов пакет економски мерки, насочен кон значително подобрување на животниот стандард на граѓаните. Мерките опфаќаат: - Ограничување на трговските маржи за намалување на цените на производите, со што ќе се зголеми куповната моќ на граѓаните и ќе помогне во борбата против инфлацијата. - За граѓаните со месечни примања и пензии до 100.000 динари (околу 850 евра), ќе се намалат каматните стапки на готовинските и потрошувачките кредити. - Како социјална мерка, донесена е одлука според која никој нема да може да остане без единствениот недвижен имот со површина до 60 м², со што се заштитуваат семејствата и децата. - Одредени категории на граѓани ќе добијат нови попусти на цената на електричната енергија, а социјално загрозените граѓани ќе имаат значителен попуст на цената на огревното дрво во следните шест месеци. „Ова се чудесни мерки кои ќе придонесат за подобар живот на милиони наши граѓани. Тие се плод на нивните барања, а јас ве молам и понатаму да ни укажувате што можеме да направиме и заедно да одиме кон промени.“ - истакна Вучиќ.

ССМ: 73,3% од работниците примиле плата под просечната плата

Според Сојузот на синдикати на Македонија, во земјава, во месец мај 2025 година евидентирани се 509.960 работници со пресметана и уплатена нето плата од кои 374.045 работници или 73,3% од работниците примиле плата под просечната плата, а 135.915 работници или 26,7% од работниците примиле плата над просечната плата. Според ССМ, загрижува фактот што 169.082 работници, односно 1/3 или 33,1% од работниците примаат плата под 30.000 денари или под 500 евра. ССМ тврди дека со одбивањето да се зголеми минималната плата, од страна на Владата, газдите и парламентот се прави директна штета на 169.082 работници и нивните семејства кои ниту со две плати не можат да си дозволат ниту да ги обезбедат најосновните услови за живот за своите семејства согласно вредноста на Синдикалната минимална кошница што е загрижувачки. Во својата објава ССМ истакнуваат дека во Македонија оние кои живеат добро со примања над просечната плата (функционерите, политичарите, газдите и експертите) се против зголемување на минималната плата, односно малцинството владее со мнозинството. Синдикатот ја опишува ситуацијата како функционер со 150.000 денари плата или 2.500 евра плата му кажува на работник со 24.397 денари или 400 евра плата како нема да му ја зголеми платата и како добро се живее, веројатно за да не аздиса многу работникот.

Бугарија и „Рајнметал“ ќе градат фабрики за барут и артилериски гранати

Бугарија и еден од најголемите европски одбранбени концерни, "Рајнметал" (Rheinmetall), ќе изградат две заеднички воени фабрики на територијата на земјата. Ова беше објавено на средбата меѓу Бојко Борисов и главниот извршен директор на "Рајнметал", Армин Папергер, во Диселдорф. Едниата фабрика ќе биде специјализирана за производство на барут и полнења, додека дгугата ќе произведува 155-милиметарски гранати по стандард на НАТО. Се очекува двете фабрики да го издигнат производството на артилериска муниција на високо ниво во Бугарија. Плановите предвидуваат комплетирање на целиот производствен циклус, што ќе гарантира висок квалитет на производот, минимизирање на ризиците при испорака на клучни компоненти и искористување на локалниот научен и производствен потенцијал. Произведената муниција ќе ги задоволува потребите на Бугарската армија, а ќе биде наменета и за извоз во други земји. Покрај тоа, изградбата на фабриките ќе отвори многу нови работни места. За изградба на новите претпријатија се избрани локации во рамките на државната ВМЗ-Сопот. Моментално, стручни тимови од бугарската влада и "Рајнметал" работат на утврдување на сите детали за реализацијата на проектот. Бугарската страна го увери Армин Папергер за својата намера проектот да биде реализиран што е можно поскоро и поуспешно. Се очекува изградбата на двете фабрики да ја зајакне позицијата на бугарската одбранбена индустрија меѓу партнерите од ЕУ и НАТО.