Царинската управа објави дека во координирани акции на граничните премини Блаце, Табановце, Богородица и Ново Село, царинските службеници и мобилните тимови заплениле речиси три илјади парчиња разновидна стока. Запленетиот асортиман вклучува облека со ознаки на заштитени трговски марки, алкохолни пијалоци, електронски цигари, играчки, козметика, па дури и мебел и автоделови. Стоката, пронајдена во возила, автобуси и товарни моторни возила, била предмет на обиди за шверц или прекршување на правата од интелектуална сопственост. Против сторителите се водат посебни постапки. На ГП Блаце се запленети повеќе од 700 парчиња разна стока: - Во комбе, во фабрички шуплини, откриени се 600 играчки. - Во друг случај, под патосници и во багажник на автомобил пронајдени се 143 парчиња парфеми и козметика. - Откриени се и три гарнитури мебел во товарно возило кое било пријавено како празно. На ГП Табановце, во три одделни случаи се запленети 26 шишиња алкохолни пијалоци (проценета вредност 30.000 денари), 209 електронски цигари пронајдени кај патник во автобус, како и уред за авто-дијагностика. Мобилен царински тим спречил и обид за шверц на осум сета воздушни и водни пумпи со соларен панел. Мобилните тимови на ГП Богородица спречиле голем обид за прекршување на правата од интелектуална сопственост. Запленети се 1.200 парчиња безжични контролери за Sony PlayStation и 650 парчиња облека со ознаки на заштитени трговски марки. Запленетата стока е одземена поради сомневање за фалсификат. На ГП Ново Село се запленети автоделови пронајдени во автомобил управуван од македонски државјанин. Царинската управа нагласува дека продолжува со засилени контроли на граничните премини во борбата против сивата економија и криминалот. Управата за јавни приходи (УЈП) ја информираше јавноста дека и покрај истекот на законскиот рок на 27 октомври 2025 година, значителен број даночни обврзници сè уште не ги исполниле своите обврски за поднесување на ДДВ-04 пријавите и плаќање на даночниот долг за третиот квартал од 2025 година. Според евиденцијата на УЈП, не се поднесени вкупно 2.209 тримесечни и 146 месечни пријави. Уште поголем е бројот на обврзници кои не го платиле пријавениот даночен долг, при што неплатени остануваат 7.436 тримесечни и 1.270 месечни даночни обврзници. „Редовноста во исполнувањето на обврските е знак на одговорност и доверба, вредности што заеднички го градат системот во кој сите учествуваме и веруваме“, истакнуваат од УЈП, потсетувајќи на важноста од навремено исполнување на обврските. Управата предупредува дека за секој ден на задоцнување се пресметува камата во износ од 0,03% од преостанатиот долг, како и можност за изрекување на дополнителни глоби. Од УЈП апелираат до сите даночни обврзници веднаш да го подмират својот долг. По доставувањето на опомените, Управата најавува дека ќе пристапи кон присилна наплата кај сите кои нема да го подмират долгот доброволно, со цел да се обезбеди стабилна даночна историја и да се избегнат непотребни последици. Министерката за финансии, Гордана Димитриеска Кочоска, денеска на прес-конференција го презентираше Предлог-буџетот за 2026 година, кој претходно беше усвоен од Владата и наскоро ќе биде доставен на усвојување во Собранието. Проекцијата предвидува вкупните приходи да изнесуваат 374,7 милијарди денари (околу 6 милијарди евра), додека вкупните расходи се проектирани наПредвидено е намалување на буџетскиот дефицит, кој е проектиран на 39,2 милијарди денари (околу 636 милиони евра), што е намалување од 0,5% во однос на претходната година. Министерката истакна дека проекцијата на даночните приходи за 2026 година се темелат на раст од 6% во однос на 2025 година, односно зголемување за околу 12 милијарди денари. Во однос на расходите, значителен пораст има кај социјалните категории: средствата за социјални трансфери се проектирани на 206,3 милијарди денари (околу 3.3 милијарди евра), што претставува раст од 6,7%. Платите се проектирани на 52,6 милијарди денари (околу 854 милиони евра), со раст од 7%, при што е опфатено и зголемувањето поради порастот на минималната плата. За пензиите се предвидени 116,8 милијарди денари (околу 1.9 милијарди евра), што е пораст од 9,7% во оваа категорија. Компанијата „Алкалоид АД Скопје“ го забележа своето 22. учество на најреномираниот светски собир во областа на фармацијата, CPhI (Convention of Pharmaceutical Ingredients). Настанот годинава се одржува од 28 до 30 октомври во Франкфурт и собра повеќе од 62.000 посетители и над 2.400 изложувачи. Тимот на „Алкалоид“ е составен од 35 претставници од различни организациски сектори, кои за време на трите саемски дена планираат повеќе од 400 деловни средби. Агендата вклучува состаноци со постојни партнери, добавувачи и нови потенцијални соработници. Генералниот директор и Претседател на УО на „Алкалоид“, Живко Мукаетов, истакна дека CPhI претставува стратешка глобална платформа за следење на најновите научни и технолошки достигнувања. „За „Алкалоид“, CPhI овозможува директен увид во најновите трендови и технологии – од вештачката интелигенција и одржливите производствени практики до нови молекули, формулации и решенија за оптимизација на глобалниот синџир на снабдување. CPhI е единствена можност за средби со постојни и потенцијални партнери.“ изјави Мукаетов. Тој додаде дека „Алкалоид“ уште во раните 2000-ти години ги препознал можностите што ги нуди овој собир за вмрежување, градење партнерства и следење на клучните трансформации во генеричката фармацевтска индустрија. CPhI, во текот на своето три и пол децениско постоење, прерасна во најголемата меѓународна фармацевтска заедница, обединувајќи стотина илјади експерти и компании кои придонесуваат кон напредокот на глобалниот фармацевтски синџир. СВР Скопје денеска (28.10.2025) поднесе кривична пријава против две раководни лица од ЈП „Комунална хигиена“ – Скопје, поради сомненија за сторено кривично дело „загрозување на животната средина и природата со отпад“. Пријавата е поднесена до Основното јавно обвинителство Скопје против С.Р. (38), во својство на в.д. директор, и А.С. (55), како управител за отпад во претпријатието. Тие се сомничат дека го сториле кривичното дело од член 230 став 1 од Кривичниот законик. Според пријавата, осомничените постапиле спротивно на Законот за управување со отпад и на нивната основна дејност за редовно собирање и транспортирање на отпадот во Скопје. Се сомничат дека со пропуштање на целосниот надзор и со непрописно управување со отпадот, овозможиле во текот на месец октомври да се создадат мали депонии на јавни и сообраќајни површини, во близина на контејнерите. Ова, пак, предизвикало значително оштетување на квалитетот на почвата, воздухот и водата, и го довело во опасност животот и здравјето на граѓаните од можна појава на заразни или други болести. Сомненијата се утврдени и констатирани со вонредни инспекциски надзори извршени од овластени локални инспектори за животна средина, кои постапувале по насоки на Јавното обвинителство. Како дополнителен доказ служи и експертско мислење од ЈЗУ Институт за јавно здравје, кое го потврдува влијанието на отпадот врз јавното здравје и можноста за ширење заразни заболувања. Државниот завод за статистика (ДЗС) објави податоци за енергетскиот биланс во 2024 година, кои укажуваат на висока енергетска зависност од увоз и значителен пад на домашното примарно производство. Според ДЗС, 65,5% од вкупната потребна енергија во Македонија е обезбедена од увоз. Вкупната потребна енергија за 2024 година изнесува 2.541.849 тони нафтени еквиваленти (toe), при што најголемо учество во оваа потрошувачка имаат нафтените продукти со 44,7%, а потоа цврстите горива со 24,9%. Во исто време, бруто-примарното производство има значителен пад од 10,6% во споредба со претходната 2023 година, достигнувајќи 842.142 toe. Најголемо намалување е евидентирано кај клучните енергетски извори – лигнитот со пад од 20,9% и хидроенергијата со намалување од 15,8%. Значителен пораст во овој сегмент е соларната електрична енергија, каде е забележано значајно зголемување од 140%. Кога станува збор за финалната потрошувачка, во 2024 година изнесувала 1.859.697 toe. Во структурата на потрошувачката, сообраќајот доминира со учество од 47,6%, што значи дека речиси половина од целата финална енергија се троши за транспорт. По него следат домаќинствата со 26,1%, индустријата со 16,9% и останатите сектори со 8,4%. Од аспект на обновливите извори, нивното учество во бруто-производството на електрична енергија е 39,4%, додека во бруто-домашната потрошувачка на електрична енергија изнесува 35,4%. Потрошувачката на електрична енергија по глава на жител на годишно ниво во домаќинствата изнесува 1.727 KWh. Министерството за внатрешни работи (МВР) и Основното јавно обвинителство (ОЈО) Гостивар покренаа истражна постапка против двајца полициски службеници од ОВР Кичево, осомничени за учество во големото разбојништво на златарница во Гостивар, од каде што на 10 октомври беа одземени 18 килограми злато. Осомничените се лишени од слобода во текот на вчерашниот ден, а Јавното обвинителство до судот поднесе предлог за одредување мерка притвор. Според информациите од МВР и Обвинителството, двајцата полициски службеници се соизвршители во кривичното дело „разбојништво“. Тие, заедно со други засега непознати лица, на 10.10.2025 година влегле во златарницата во Гостивар и со употреба на сила и закана со огнено оружје го извршиле грабежот. Осомничените се договориле и направиле план за грабежот со другите лица за кои интензивно се трага. Учествувале во подготовките со извиди на локацијата и на работата на златарницата два дена пред грабежот. На денот на разбојништвото, тие со службено возило на МВР го обезбедувале патот на двете возила искористени за грабежот. Двете возила што биле искористени за грабежот подоцна биле пронајдени: едното запалено на магистралниот пат Гостивар-Дебар, а другото напуштено во Кичево, во близина на сточниот пазар. Обвинителството побара притвор за осомничените поради опасност од бегство, можност за попречување на постапката со прикривање докази и влијание врз сведоците, како и опасност од повторување на делото. МВР во координација со ОЈО Гостивар продолжува со мерки и активности за пронаоѓање и на другите инволвирани лица и целосно расчистување на случајот. Вработените од ЈП „Паркови и зеленило“ - Скопје, ДООЕЛ „Флораком“ и ДООЕЛ „Луна“ денеска повторно излегоа на протест, изразувајќи незадоволство поради неисплатената плата за месец септември. Тие извршија блокада на две клучни точки во Скопје – раскрсницата пред Зоолошката градина и булеварот „Илинден“ кај Матично. Од синдикатите најавуваат дека доколку платата не биде исплатена во текот на денот, протестите ќе продолжат и во наредните денови со построги мерки. „Доколку од страна на раководството на ЈП „Паркови и зеленило“ - Скопје, односно директорот, не биде исплатена и денес платата за вработените од овие три фирми, ја известуваме јавноста дека протестите ќе продолжат и наредните денови со блокада на влезовите на ЈП „Паркови и зеленило“ - Скопје во периодот од 06:45 до 09:00 часот“, се вели во соопштението. Покрај основната плата за септември, вработените алармираат дека не им се исплатени и регрес за годишен одмор, јубилејни награди, отпремнина за заминување во пензија итн. Вработените најавуваат дека ќе ги искористат сите законски права и ќе поднесат и поединечни тужби за да го добијат она што им следува согласно Колективниот договор и Законот. 
