Министерот за транспорт, Александар Николоски, за време на денешната посета на Радовиш објави дека е распишана постапката за избор на проектантска куќа која ќе ја изработи целокупната документација за изградба на нов експресен пат. Трасата ќе се протега од Радовиш, преку Струмица и Ново Село, сè до граничниот премин со Република Бугарија.
Со овој проект се планира обезбедување уште едно современо патно поврзување меѓу двете земји. Процесот во оваа фаза опфаќа изработка на предпроектна документација, еколошки и социјални студии, како и физибилити студија, а рокот за поднесување на понудите е отворен до 8 октомври.
Очекувањата се дека по изборот на консултантската куќа, подготовката на комплетните студии ќе заврши во рок од шест до девет месеци, по што веднаш ќе се премине кон тендерирање за избор на изведувач. Градежните активности на терен се планира да започнат идната есен.
Проектот целосно ќе се финансира со сопствени средства на Јавното претпријатие за државни патишта. Според Николоски, претпријатието располага со стабилен прилив на средства и одлична финансиска кондиција за самостојно да ја изнесе реализацијата на оваа значајна инфраструктурна инвестиција. Во Министерството за земјоделство, шумарство и водостопанство се одржа јавна расправа за новиот Предлог-закон за уредување на пазарите со земјоделски производи. Министерот Борче Серафимовски порача дека со ова законско решение се воспоставува нов систем за појасна распределба на одговорноста меѓу производителите, откупувачите и преработувачите, со цел да се стави крај на неизвесноста и ад хок решенијата во аграрниот сектор.
Новиот закон ги обединува организираниот откуп, договорните односи, пазарните информации, интервентните мерки, задолжителните пазарни стандарди и здружувањето на производителите. Со него не се предвидува административно одредување на цените, туку се воведуваат прецизни правила кои налагаат писмен договор пред испораката со однапред утврдени количини, квалитет, рокови за плаќање и начин на пресметка на цената.
Законот предвидува воведување електронска евиденција на регистрираните откупувачи и нов Земјоделски пазарен информативен систем со национална опсерваторија. Овие алатки ќе овозможат следење на понудата, побарувачката, цените и залихите во реално време, со што институциите ќе можат навремено да препознаваат пазарни ризици и да спроведуваат мерки за јавна интервенција и поддршка за приватно складирање.
По посебен акцент е ставен на поддршката за организирање на земјоделците во групи и организации на производители за зајакнување на нивната преговарачка позиција. Предложените механизми воедно обезбедуваат и целосно усогласување на домашната регулатива со правилата на Европската Унија за заедничка организација на земјоделските пазари. Според податоците на Државниот завод за статистика за 2024 година, Југоисточниот Регион има најголемо поединечно учество во креирањето на бруто-додадената вредност во македонското земјоделство со 30,5 проценти. Веднаш зад него се наоѓа Пелагонискиот Регион со учество од 28,8 проценти.
Најмало учество во создавањето на бруто-додадената вредност во овој сектор е евидентирано во Југозападниот Регион, каде што изнесува само 3 проценти.
Во однос на структурата на земјоделското производство, Југоисточниот Регион го држи приматот и во создавањето на вредноста на растителното производство, учествувајќи со 33,1 процент во вкупниот национален биланс.
Кај добиточното производство, Полошкиот Регион се издвојува како водечки во земјата, остварувајќи најголемо учество во создавањето на вкупната вредност на овој земјоделски сегмент со 17,2 проценти.
Министерката за енергетика, рударство и минерални суровини, Сања Божиновска, ја отвори петтата Годишна соларна конференција во организација на Македонската соларна асоцијација - Солар Македонија. Пред присутните компании, инвеститори и експерти од секторот, Божиновска порача дека соларната енергија е веќе реалност во домашниот енергетски сектор, но дека во следната фаза е потребен подобро планиран и подлабок системски пристап.
Министерката подвлече дека изградбата на нови капацитети од обновливи извори мора да биде усогласена со капацитетот на дистрибутивната и преносната мрежа, со цел да се обезбеди долгорочна стабилност и функционалност на целиот енергетски систем.
Со новата законска рамка за енергетика и обновливи извори се воведуваат годишни планови за развој на инфраструктурата кои однапред ќе дефинираат каде и под кои услови ќе можат да се градат нови енергетски капацитети. Покрај ова, Министерството става акцент врз модернизацијата и дигитализацијата на мрежата, како и врз развојот на системи за батериско складирање на енергијата.
Паралелно се вршат подготовки и за идно користење на нови технологии, меѓу кои е изготвувањето на првата сеопфатна Водородна студија, додека новиот гасен интерконектор со Грција се проектира да овозможи и иден транспорт на зелен водород. Божиновска им порача на инвеститорите дека државата нуди отворена врата и сигурност, но исклучиво преку јасни, еднакви и предвидливи правила за сите учесници на пазарот. Директорот на Дирекцијата за технолошки индустриски развојни зони (ДТИРЗ), Гоце Димовски, присуствуваше на одбележувањето на 10-годишниот јубилеј од отворањето на фабриката „Гентерм“ во ТИРЗ Прилеп. Присуството на јубилејот ја потврди континуираната соработка меѓу институциите и компаниите во зоните, со фокус врз создавањето стабилна, предвидлива и конкурентна деловна средина.
Во своето обраќање, Димовски упати честитки до менаџментот и вработените, истакнувајќи дека десетгодишното присуство на оваа мултинационална компанија во Прилеп е доказ за значењето на партнерскиот однос меѓу државата и странските инвеститори.
Димовски подвлече дека инвестициите од овој тип имаат многу пошироко економско значење преку отворањето нови работни места, зголемувањето на извозот, развојот на домашната економија и трансферот на нови знаења и вештини.
„Одлуката на една мултинационална компанија да инвестира во Македонија е важен чекор. Но, уште поважно е таа компанија да продолжи да работи, да се развива, да инвестира во луѓето и да ја гледа земјата како дел од својата долгорочна стратегија. Тоа е вредноста на континуитетот. И токму тоа го одбележуваме денес. За нашата земја, присуството на компании како Гентерм има значење што ги надминува рамките на една инвестиција“, изјави Димовски.
Тој ја истакна и посветеноста на Владата предводена од премиерот Христијан Мицкоски за унапредување на инвестициската клима, обезбедување стабилно деловно опкружување и континуиран дијалог со бизнис-секторот со цел отворање нови економски можности за граѓаните. Министерот за земјоделство, шумарство и водостопанство, Борче Серафимовски, оствари работна средба со амбасадорот на Француската Република, Кристоф Ле Риголер, и регионалниот советник за земјоделство, Александре Мартинез. На состанокот беа разгледани можностите за зајакнување на билатералните односи во аграрниот сектор, со посебен фокус врз европските интеграции и усогласувањето со стандардите на Европската Унија.
За време на разговорите, посебен акцент беше ставен врз зголемувањето на присуството на македонските земјоделски и прехранбени компании на реномираните француски саеми. Ваквата соработка има за цел да овозможи промоција на домашните производи, отворање нови извозни пазари и воспоставување директни бизнис-партнерства со француски компании.
Соговорниците ја потврдија заложбата за продолжување на конструктивниот дијалог преку конкретни иницијативи насочени кон модернизација, поголема конкурентност и меѓународна афирмација на македонскиот аграрен сектор. Градоначалникот на Општина Прилеп, Дејан Проданоски, оствари работна средба со австралискиот амбасадор Питер Трасвел, почесниот конзул и претставници на Амбасадата на Австралија. На состанокот беа разгледани можностите за продлабочување на билатералните односи, привлекување странски инвестиции и користење на австралиските грантовски програми за локален развој.
За време на средбата е истакнато дека Прилеп има долгогодишна традиција на соработка со Австралија, започната уште во 2008 година преку партнерството со општината Винсент од Перт. Градоначалникот Проданоски ги презентираше економските и туристичките капацитети на градот, со посебен акцент врз можностите за инвестирање во секторите поврзани со природните ресурси, суровините и индустријата.
На средбата беа презентирани и можностите од Програмата за директна помош (Direct Aid Program) на австралиската амбасада, која нуди финансирање за локални проекти на невладиниот сектор и граѓанските организации. Програмата става приоритет врз зелената транзиција, заштитата на животната средина, како и зајакнувањето на улогата на жените и младите во економијата.
Општина Прилеп и австралиската делегација искажаа подготвеност оваа средба да прерасне во платформа за нови бизнис-контакти, размена на искуства и конкретни социјални и економски проекти. 
