Македонија

Владата потпиша договор за соработка со Обединетото Кралство за модернизација на железничката инфраструктура

Министерот за транспорт Александар Николоски најави важен чекор напред во развојот на железничката инфраструктура во земјава. На редовна седница на Владата е разгледана и усвоена информацијата за склучување на договор за соработка помеѓу Јавното претпријатие за железничка инфраструктура – Скопје и Јавното тело на Министерството за транспорт на Владата на Обединетото Кралство, Кросрејл Интернешнал Лимитед (Crossrail International Limited - CIL). Овој договор за соработка претставува значаен потег за модернизација на македонската железничка мрежа, со посебен фокус на развојот на брзата железница и товарниот железнички сообраќај. Како дел од договорот, двете страни ќе соработуваат преку споделување на експертиза, искуства, добра практика и научени поуки во областите како што се сигнални и контролни системи, надградба на инфраструктурата, модернизација на депоата и железничкиот возен парк. "Овој договор е продолжување на веќе успешната соработка помеѓу нашата влада и владата на Обединетото Кралство, која започна во контекст на партнерството за реализација на приоритетни инфраструктурни проекти," изјави министерот Николоски. "Со оваа соработка, ќе имаме можност да ја унапредиме нашата железничка инфраструктура и да го зајакнеме транспортниот сектор во Македонија." Договорот е важечки пет години, со можност за продолжување на уште пет години, и ќе има значајно влијание врз развојот на железничката инфраструктура и економскиот раст на земјата.

644 сообраќајни прекршоци и 5 возачи лишени од слобода за безобзирно управување со возило

Во текот на вчерашниот ден (23.09.2025) во рамки на редовните сообраќајни контроли што ги реализираат полициските службеници од сите сектори за внатрешни работи на патиштата низ земјава, вкупно се издадени 644 платни од кои 183 се сообраќајни прекршоци за непрописно паркирање и 158 прекршоци за управување на возилото со брзина поголема од пропишаната. Согласно одредбите на Законот за безбедност на сообраќајот на патиштата, се изречени и 82 прекршоци за возачи кои управувале возила без возачка дозвола, потоа евидентирани биле 33 прекршочни санкции за користење на мобилен телефон и 37 прекршоци заради неносење сигурносен појас, додека пак за неносење заштитен шлем биле санкционирани 27 возачи на мотоцикл. Исто така, санкционирани се двајца возачи на електрични тротинети, петмина возачи што поминале на црвено светло како и 10 возачи што управувале возило со недозволено количество алкохол во крвта. Воедно од страна на полициските службеници вчера се лишени од слобода и петмина возачи на коишто ќе им бидат поднесени кривични пријави по основ на член 297-а од КЗ на РСМ („безобзирно управување моторно возило“) затоа што кај нив се детектирани вредности на алкохол во крвта над 1,5 промили. Инаку, согласно Законот за возачи од сообраќај се отстранети 16 возила заради непоседување важечка сообраќајна дозвола, како и четири возила поради техничка неисправност. Од полицијата апелираат до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта.

Мицкоски: Платите пораснаа за над 10,5% во јули, а државниот и јавниот долг е намален

Претседателот на Владата на Република Македонија, Христијан Мицкоски, денеска истакна дека според последните податоци на Државниот завод за статистика, платите во јули 2025 година пораснале за повеќе од 10,5% во споредба со јули 2024. Мицкоски ја истакна важноста на овие податоци како доказ за растот на економијата, а посебно на платите и ја разбија тезата на опозицијата дека во неговиот мандат не се остваруваат подобрувања на економски план. „Секогаш треба да работиме повеќе за да создадеме услови во кои бизнисите ќе се развиваат и ќе можат да обезбедат повисоки плати за работниците“, изјави премиерот. Во врска со критиките на опозициската партија СДСМ, Мицкоски посочи дека нивните тврдења дека платите не растеле, а задолжувањето на државата се зголемило, се покажуваат како неосновани. Според него, податоците објавени од Државниот завод за статистика го покажуваат спротивното, со што ги демантирале тврдењата на опозицијата. Покрај растот на платите, премиерот истакна дека по долг период, за првпат, и државниот и јавниот долг се намалени. Државниот долг се намалил за 4%, додека јавниот долг за 2,7% на крајот од вториот квартал на 2025 година.

Градоначалникот Костовски најави изградба на нова поликлиника во Бутел

Општина Бутел го добива најголемиот здравствен проект досега – нова поликлиника. Дарко Костовски, градоначалник на Општина Бутел, најави дека Владата ја одобрила последната одлука за реализација на овој важен проект, кој ќе ја подигне здравствената инфраструктура во оваа општина на високо ниво. Според Костовски, проектот е веќе подготвен, локацијата е обезбедена, а потребните средства од 117.725.000 денари се осигурени. Ова е голем чекор напред за општината, бидејќи ќе се обезбеди современ здравствен сервис за сите граѓани на Бутел. "До крајот на неделата, очекуваме потпис на договорот со Министерството за здравство, а за неколку дена ќе започнеме со тендерирање за изведувач на проектот", изјави Костовски. Градоначалникот изрази благодарност до премиерот Христијан Мицкоски за неговата значајна поддршка која ја овозможи реализацијата на оваа одлука и ги пофали напорите за исполнување на најголемото барање на граѓаните на Бутел.

Полициски тим евакуираше тројца белгиски државјани кои побарале помош додека планинареле во Центар Жупа

Полициски тим од ОВР Дебар синоќа успешно извлече тројца белгиски државјани кои побарале помош додека планинареле во планинскиот предел над Дебар, во близина на селото Новак, општина Центар Жупа. Повикот за помош бил примен на 22 септември во 19:13 часот, откако странските државјани пријавиле дека биле нападнати од овчарски кучиња. По добиената локација, полициски тим со теренско возило веднаш се упатил на терен, каде со помош на локалниот ловочувар ги лоцирал и безбедно ги пренел планинарите до нивното возило. Спасените се идентификувани како Л.М. (42), М.Л.К. (62) и Ј.Ј. (41), сите белгиски државјани. Тие изјавиле дека биле нападнати од кучиња откако поставиле камп-шатор, по што биле принудени да побегнат и да се искачат на столб за мобилна телефонија за да се заштитат. Од Министерството за внатрешни работи информираат дека лицата биле во добра здравствена состојба и не претрпеле повреди.

Просечната нето-плата порасна на 45.276 денари во јули

Според податоците од Државниот завод за статистика, просечната месечна исплатена нето-плата по вработен во јули 2025 година изнесува 45.276 денари, што претставува раст од 10,5% во однос на истиот месец минатата година. Зголемувањето на просечната нето-плата се должи пред сè на повисоките примања во одредени сектори, како што се: - Административни и помошни услужни дејности, со раст од 16,5%. - Образование, со раст од 15,0%. - Здравствена и социјална заштита, со раст од 14,8%. Иако трендот е позитивен на годишно ниво, намалување на платите во споредба со претходниот месец (јуни 2025) е забележано во неколку сектори: - Финансиски дејности и осигурување – пад од 4,0%. - Рударство и вадење на камен – пад од 3,3%. - Информации и комуникации – пад од 3,0%. Во однос на бруто-платата, статистиката покажува дека во јули 2025 година просечната исплатена бруто-плата изнесувала 68.102 денари, што е зголемување од 10,6% во споредба со јули 2024 година.

Поднесени 32 кривични пријави за предизвикување на пожари, приведени 56 лица

Министерството за внатрешни работи извести дека од 01.04.2025 до 23.09.2025 година, регистрирани се вкупно 2.012 пожари на отворен простор, при што приведени се вкупно 56 лица, а по преземени мерки поднесени се 32 кривични пријави. Најголемиот број на настанати пожари е утврдено дека се предизвикани од човечки фактор, со различни мотиви и се преземаат мерки и активности за расчистување на случаите и откривање на нивна евентуална меѓусебна поврзаност. Воедно се известуваат граѓаните дека од 01.07.2025 година, откако е воведена забрана за движење во шуми, до 23.09.2025 без писмено одобрение за движење во шума, биле затекнати 27 лица. Против истите ќе бидат поднесени соодветни поднесоци по Закон за шуми. Во насока на рана превенција од пожари, полициските служби употребуваат дронови за мониторирање на шумските појаси на територијата на државата. Со воведувањето на овие оперативни мерки зголемена е ефикасноста во делот на раното предупредување и лоцирање на евентуалните пожари, како и детектирањето на можните причини или причинители на истите.

Мицкоски оствари средба со претседателот на Стопанската комора на Дубаи

Денес во Владата се одржа работна средба на која присуствуваше претседателот на Владата, Христијан Мицкоски, претставници од бизнис заедницата и Мохамед Али Рашед Лута, претседател и главен извршен директор на Стопанската комора на Дубаи. На средбата премиерот Мицкоски информираше дека приоритет на Владата е економската стабилизација на земјата, односно како што рече тој да донесеме што е можно повеќе странски, директни инвестиции и секако да ги подржи домашните директни инвеститори. Мохамед Али Рашед Лута претседател и главен извршен директор на Стопанска комора на Дубаи на средбата истакна: „Растечката соработка меѓу Дубаи и Северна Македонија ја одразува нашата заедничка амбиција да изградиме отпорни економии и да поттикнеме одржлив развој. Трговијата меѓу нашите пазари достигна вкупно 495 милиони американски долари во текот на изминатите пет години, нагласувајќи го долгорочниот тренд на позитивен ангажман и растечки можности. Овој моментум се одразува и во растечкото присуство на македонските компании во Дубаи во различни сектори.“ Мохамед Али Рашед Лута додаде: „Стопанската комора на Дубаи останува посветена на зајакнување на врските меѓу нашите деловни заедници и промовирање на инвестициски текови што ги унапредуваат нашите заеднички приоритети. Гледаме значаен потенцијал во ова партнерство и сме решени да осигуриме дека ќе донесе опипливи резултати преку проширена трговија и подлабока соработка за обликување на долгорочен просперитет на двата пазара.“

РКЕ ја зголеми цената на дизелот и мазутот, новите цени стапуваат на сила од полноќ

Регулаторната комисија за енергетика, водни услуги и услуги за управување со комунален отпад (РКЕ) донесе одлука за зголемување на малопродажните цени на нафтените деривати во просек за 0,26% во однос на претходната пресметка од 15.09.2025 година. Оваа промена ќе се одрази на цените на дизелот, екстра лесното масло и мазутот, додека цените на бензините остануваат непроменети. Според последната пресметка, референтните цени на нафтените деривати на светскиот пазар покажуваат мешан тренд. Бензините поевтинуваат за 0,368%, додека цените на дизелот, екстра лесното масло и мазутот се зголемуваат. Така, дизелот бележи зголемување од 2,18%, екстра лесното масло за 1,48%, а мазутот за 1,69%. Дополнително, ослабувањето на курсот на денарот во однос на доларот за 0,6675% има влијание врз цените на нафтените деривати. Од 23 септември 2025 година, од 00:01 часот, максималните малопродажни цени на нафтените деривати ќе бидат: - Моторен бензин ЕУРОСУПЕР БС-95 – 75,50 денари/литар. - Моторен бензин ЕУРОСУПЕР БС-98 – 77,50 денари/литар. - Дизел гориво ЕУРОДИЗЕЛ БС (Д-Е V) – 69,50 денари/литар. - Масло за горење Екстра лесно (ЕЛ-1) – 69,00 денари/литар. - Мазут М-1 НС – 36,947 денари/кг. Сите други нафтени деривати, освен дизелот и мазутот, ќе останат на исти цени. Малопродажната цена на дизелот ќе се зголеми за 0,50 ден/лит, додека мазутот ќе поскапе за 0,207 ден/кг. РКЕ нагласува дека овие цени претставуваат максимални износи и дека трговците на големо и мало со нафтени деривати и горива за транспорт имаат право да ги формираат цените и пониско од утврдените максимуми.

Брако испорача 50 возила за чистење во главниот град на Саудиска Арабија

Над 50 возила за чистење Грин Машинс произведени во фабриката БРАКО од Велес се продадени во главниот град на Саудиска Арабија, Ријад. Со тоа, македонскиот инженерски производ се најде во служба на еден од најголемите урбани проекти на Блискиот Исток. Од производствените хали на БРАКО во Велес, директно на улиците на Ријад – над 50 специјализирани возила GM636 се веќе испорачани и активно се користат за одржување на хигиената во главниот град на Саудиска Арабија. Се работи за голема и комплексна испорака, во рамки на една од најобемните јавни програми за чистење во тој регион, каде што повеќе изведувачи беа ангажирани за чистење на различни делови од градот. 50 возила од брендот Грин Машинс на БРАКО се вклучени во тој проект. За потребите на проектот во Ријад, тимот на БРАКО дополнително го зајакна моделот, прилагодувајќи го за работа во специфични климатски услови и за ефикасно справување со песочни наноси на улиците и јавните површини. Испораките за Саудиска Арабија не завршуваат тука – фабриката во Велес очекува нови нарачки за возила за чистење и во други саудиски урбани центри.