Дирекцијата за Технолошко-индустриски развојни зони (ТИРЗ) најави потенцијална нова странска директна инвестиција од германската технолошка компанија Heidelberg Postpress. Директорот на ТИРЗ, Гоце Димовски, денеска оствари средба со Матиас Лаубенштајн, директор на Heidelberg Postpress, при што се разгледуваа можностите за отворање нов производствен погон во Македонија. Компанијата изрази интерес за инвестирање во рамките на зоните, при што како потенцијални локации беа разгледани ТИРЗ Скопје и ТИРЗ Штип. На средбата, директорот Димовски ги презентираше можностите и поволностите што ги нуди Македонија, нагласувајќи ја стратешката локација и даночните олеснувања достапни за инвеститорите. Матијас Лаубенштајн посочи дека стабилната деловна средина, пристапот до квалификувана работна сила и транспарентната поддршка од институциите се клучни фактори во нивната анализа за избор на нова локација. Heidelberg Postpress е компанија која работи во областа на машинското инженерство. Ги снабдува компаниите со пакување и дигитално печатење, софтверски решенија, услуги и потрошен материјал. Компанијата моментално се фокусира на проширување во нови деловни области како што се високо прецизно инженерство на постројки со интегрирана контрола, технологија за автоматизација и роботика, како и растечките зелени технологии. Доколку оваа инвестиција се реализира, ќе придонесе во отворање на нови работни места и пренесување на напредните германски технологии и стандарди во македонската економија. Основното јавно обвинителство Крива Паланка поведе постапка против три лица – татко и неговите две ќерки поради постоење на основано сомнение за извршено кривично дело „Спречување службено лице во вршење службено дејствие“. Осомничените, како соизвршители, на 2 декември со сила и сериозна закана спречиле службени лица од Агенцијата за храна и ветеринарство (АХВ), кои биле со полициска асистенција, да спроведат правосилно и извршно решение за одземање на домашен крупен добиток. Јавниот обвинител, имајќи ја предвид опасноста од бегство, но и можноста за повторување на делото, до надлежниот суд поднесе предлог за определување мерка притвор за сите три лица. Според Обвинителството, од однесувањето на осомничените произлегува дека тие подолг временски период го малтретираат месното население и соседите, и покрај сите досега преземени активности од надлежните државни органи, а сега започнале и со дејствија на спречување на вработени во надлежните инспекциски служби на АХВ и униформирани полициски службеници. Секторот за контрола и истраги при Царинската управа успешно откри и спречи обид за шверц на вкупно 5.200 штеки цигари, спакувани во 104 пакети. Случајот е откриен на граничниот премин „Ново Село“, каде камион пријавен како празен на излез од државата бил селектиран за детален царински преглед. Инспекторите од Одделението за оперативни работи, во полуприколката ладилник открија специјално конструиран бункер со преграда каде биле сокриени цигарите. По спроведените истражни дејствија од страна на Одделението за истраги, поднесена е кривична пријава против возачот, кој е српски државјанин. Директорот на Царинската управа, Бобан Николовски, истакна дека борбата со царински измами и спречувањето на обиди за шверц на тутун и тутунски производи е една од клучните обврски, нотирани и во извештајот на Европската Комисија, на која управата е целосно посветена. Николовски нагласи дека годинава, заклучно со 30 ноември, Царинската управа по основ на увоз на тутун и тутунски производи наплатила 15,3 милијарди денари, што претставува раст од 10% во однос на минатата година. Кумулативно, заклучно со 30 ноември, годинава се наплатени приходи од 1,95 милијарди евра, што е за 86,9 милиони евра повеќе од лани истиот период, забележувајќи раст од 4,7%. Раст е регистриран по сите основи: Приходите од наплата на царина со раст од 15,1%, од ДДВ при увоз 3,2% раст, од Данокот на моторни возила (ДМВ) од 10,9% и од акциза 4,6%. Комисијата за одлучување по прекршок при Комисијата за заштита на конкуренцијата (КЗК) донесе решение со кое утврди постоење на усогласено однесување, односно картел, помеѓу десет осигурителни компании на пазарот за задолжително осигурување од автомобилска одговорност. Според Комисијата, казнети се следниве компании: „Еуроинс Осигурување АД Скопје“, „Триглав Осигурување АД Скопје“, „АД Македонија Скопје - Виена Иншуренс Груп“, „Сава Осигурување АД Скопје“, „Еуролинк АД Скопје“, „Граве АД Скопје“, „Уника АД Скопје“, „АД Осигурителна Полиса Скопје“, „Халк Осигурување АД Скопје“ и „Кроација Осигурување АД Скопје“. Во текот на постапката, од КЗК утврдиле дека во периодот од 1 март до 7 мај, компаниите разменувале чувствителни информации и ги координирале своите активности. Како резултат на тоа, во исклучително краток рок, донеле идентични или усогласени одлуки за зголемување на делот од премијата наменет за вршење дејност, познат како режиски додаток. Според Законот за заштита на конкуренцијата, ваквото однесување претставува најтешка форма на повреда – ограничување на конкуренцијата „по своја цел“. Размената на информации и паралелното донесување на ценовни одлуки ја заменила независната деловна политика со координирано колективно дејствување на пазарот, што е строго забрането. Врз основа на утврдените факти, Комисијата изрече прекршочни санкции - глоби во вкупен износ од 17.266.930 денари (околу 280.000 евра). Од КЗК нагласија дека остануваат посветени на заштита на фер пазарните услови, спречување на картели и обезбедување на конкурентна средина во интерес на потрошувачите и стопанството. 
