Комисијата за одлучување по прекршок при Комисијата за заштита на конкуренцијата (КЗК) донесе решение со кое утврди постоење на усогласено однесување, односно картел, помеѓу десет осигурителни компании на пазарот за задолжително осигурување од автомобилска одговорност. Според Комисијата, казнети се следниве компании: „Еуроинс Осигурување АД Скопје“, „Триглав Осигурување АД Скопје“, „АД Македонија Скопје - Виена Иншуренс Груп“, „Сава Осигурување АД Скопје“, „Еуролинк АД Скопје“, „Граве АД Скопје“, „Уника АД Скопје“, „АД Осигурителна Полиса Скопје“, „Халк Осигурување АД Скопје“ и „Кроација Осигурување АД Скопје“. Во текот на постапката, од КЗК утврдиле дека во периодот од 1 март до 7 мај, компаниите разменувале чувствителни информации и ги координирале своите активности. Како резултат на тоа, во исклучително краток рок, донеле идентични или усогласени одлуки за зголемување на делот од премијата наменет за вршење дејност, познат како режиски додаток. Според Законот за заштита на конкуренцијата, ваквото однесување претставува најтешка форма на повреда – ограничување на конкуренцијата „по своја цел“. Размената на информации и паралелното донесување на ценовни одлуки ја заменила независната деловна политика со координирано колективно дејствување на пазарот, што е строго забрането. Врз основа на утврдените факти, Комисијата изрече прекршочни санкции - глоби во вкупен износ од 17.266.930 денари (околу 280.000 евра). Од КЗК нагласија дека остануваат посветени на заштита на фер пазарните услови, спречување на картели и обезбедување на конкурентна средина во интерес на потрошувачите и стопанството. Народната банка потврди дека квалитетот и безбедноста на македонските златни резерви, кои се чуваат во Трезорот на Банката на Англија во Лондон, се на највисоко ниво. Гувернерот на Народната банка, д-р Трајко Славески, заедно со својот тим оствари работна посета на Трезорот како дел од вообичаените активности на централните банки за обезбедување највисоки стандарди на сигурност и безбедност при чувањето на монетарното злато. Македонија располага со околу 6,9 тони монетарно злато, чија тековна пазарна вредност изнесува приближно 800 милиони евра. Златото се чува во Трезорот на Банката на Англија во алоцирана форма, претставувајќи маркирани златни прачки кои во целост го исполнуваат строгиот стандард на пазарот на злато во Лондон (London Good Delivery Standard). Овој стандард подразбира прачки со содржина на злато од најмалку 99,5% и тежина од околу 12 килограми. За време на увидот, беше презентиран примерок од златните прачки во сопственост на земјата. Гувернерот и неговиот тим извршија визуелна проверка, при што беше потврдено дека примероците одговараат на сериските броеви и дека се со правилна форма, согласно утврдените стандардни спецификации. Одлуката златото да се чува во Банката на Англија е донесена уште во 2010 година, поради сигурноста и флексибилноста што ги нуди инфраструктурата на оваа централна банка, како и пристапноста до пазарот на Лондон, кој е најголем пазар со злато во светот. Банката на Англија се грижи за над 400.000 златни прачки вредни милијарди фунти, чувајќи ги под највисоки безбедносни стандарди за владите, централните и првокласните странски деловни банки ширум светот. Народната банка истакна дека поради исполнувањето на високите стандарди и пристапноста до учесниците на пазарот во Лондон, ова злато може да се искористи за остварување дополнителни монетарни приходи. Тоа би можело да се реализира преку пласмани на краткорочни депозити и склучување трансакции со злато со првокласни странски банки, особено при поволни пазарни услови и покрај неговата значителна ценовна апрецијација. Царинската управа денеска го презентираше најновиот додаток во својата опрема - софистициран скенер за поштенски пратки, инсталиран во Царинската испостава Пошта. Скенерот е опремен со вештачка интелигенција и ќе помага во борбата против шверцот на огнено оружје, дрога и експлозиви преку поштенски пратки. Капацитетот за скенирање е стотици пратки во минута, користејќи ја вештачката интелигенција за прецизна детекција на забранети предмети. „Скенерот за поштенски пратки е од големо значење во заедничката борба против тероризмот, спречување пролиферација на мало и лесно оружје и недозволената трговија со дрога.“ - истакна директорот Николовски. Тој нагласи дека во Царинската испостава Пошта, каде што е поставен скенерот, годинава поминале над 100.000 пратки. Овој скенер е донација од Канцеларијата на ОН за дрога и криминал во рамки на проектот Хермес 2, чија цел е спречување пролиферација на огнено оружје и експлозиви преку поштенски пратки во земјите од Западен Балкан. Николовски се заблагодари на UNODC, како и на земјите-донатори: Германија, Шведска, Холандија, Франција, Обединетото Кралство и Норвешка за нивната севкупна поддршка во борбата против организираниот криминал, потенцирајќи дека донацијата е силен доказ за заедничката посветеност на државите во справувањето со криминалот на меѓународно ниво. Киро Цветков од UNODC истакна: „Еден од најчестите начини на криумчарење оружје е преку испраќање на нивни делови и компоненти во поштенски пратки. Со вградената вештачка интелигенција, скенерот става акцент на деловите и компонентите, препознавајќи ги и детектирајќи ги сомнителните пратки.“ Тој додаде дека институциите работат на измени на Законот за кривична постапка, кои ќе овозможат употреба на посебни истражни мерки, како што е симулирана достава, за делата поврзани со делови и компоненти на огнено оружје. Сојузот на синдикати на Македонија (ССМ) упати предупредување до надлежните институции, најавувајќи протести и штрајкови доколку не биде прифатено барањето на работниците за зголемување на минималната плата. Според последното истражување на ССМ, работниците сметаат дека минималната плата треба да се движи помеѓу 600 и 700 евра, што подразбира зголемување од најмалку 200 до 300 евра. Претседателот на ССМ, Слободан Трендафилов, истакна дека иако некои експерти заговараат промена на методологијата, решението кое се нудеше пред 2022 година значеше годишен раст на минималецот од само 100, 200 или 500 денари. Тој потсети дека доколку ССМ не протестираше во 2022 година за промена на методологијата и за зголемување на минималната плата, по старите параметри (една третина од просечната плата, инфлација и БДП), минималецот во 2026 година би изнесувал само 20.682 денари, што е за 5.379 денари помалку од она што евентуално ќе се усогласи. Трендафилов потенцираше дека со сегашната минимална плата земјата е на дното, а со враќање на старите параметри ќе го пробиеме и дното. Поради ова, тој ги предупреди надлежните дека доколку не се зголеми минималецот согласно барањата на работниците, тие се спремни да протестираат и да штрајкуваат. Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 1,1% во однос на одлуката од 27.11.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,2%, кај дизелот за 3,3%, кај екстра лесното масло за 2,3% и кај мазутот за 4,4%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,0096%. Од 2.12.2025 година од 00:01 часот максималните цени на нафтените деривати ќе изнесуваат: - Моторен бензин (ЕУРОСУПЕР БС-95) - 75,00 (денари/литар). - Моторен бензин (ЕУРОСУПЕР БС-98) - 77,00 (денари/литар). - Дизел гориво (ЕУРОДИЗЕЛ БС Д-Е V) - 69,50 (денари/литар). - Масло за горење (Екстра лесно 1) - 66,50 (денари/литар). - Мазут (М-1 НС) - 33,963 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат. Малопродажните цени на ЕУРОДИЗЕЛ (Д-Е V) и на Екстра лесното масло за домаќинство (ЕЛ-1) се намалуваат за 1,00 ден/лит. Малопродажната цена на Мазутот (М-1 НС) се намалува за 0,902 ден/кг и сега ќе изнесува 33,963 ден/кг. Од РКЕ напоменуваат дека ова се максималните цени на нафтените деривати од 00:01 часот на 2.12.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени. Државниот завод за статистика (ДЗС) објави дека бројот на работници во индустријата во октомври е намален за 2,8% во споредба со истиот месец лани. Овој негативен тренд е забележан во секторот Рударство и вадење на камен кадешто намалувањето изнесува 2,8%, во секторот Преработувачка индустрија има пад од 2,9%, а во секторот Снабдување со електрична енергија, гас, пареа и климатизација има намалување за 1%. Според главните индустриски групи, најголем пад во бројот на работниците во однос на октомври лани е регистриран во групата Капитални производи со намалување од 5,6%, потоа следат Нетрајни производи за широка потрошувачка со 3,1%, Енергија со 2,1% и Интермедијарни производи, освен енергија со 0,3%. Зголемување на бројот на работници има во групата Трајни производи за широка потрошувачка за 4,6%. За периодот јануари-октомври, бројот на работниците во индустријата бележи намалување од 3,6% во однос на истиот период претходната година. 
